Sot, Komuna e Kërçovës u mbush me kureshtjen, buzëqeshjet dhe pyetjet e nxënësve të klasës së VI-të të SHFK “Kuzman Josifoski-Pitu” – Kërçovë, të cilët realizuan një vizitë edukative në vetëqeverisjen lokale
Nxënësit u pritën nga kryetari i Komunës, Dr. Aleksandar Jovanovski, i cili u uroi mirëseardhje dhe u shpjegoi se Komuna është institucion që çdo ditë punon në shërbim të qytetarëve, për rregullimin e qytetit, përmirësimin e shërbimeve dhe krijimin e kushteve më të mira për jetesë.
Në sallën e Këshillit, nxënësit u njohën me mënyrën se si funksionon Këshilli i Komunës, si zhvillohen diskutimet dhe merren vendimet nga këshilltarët, si miratohen programet dhe planet, si dhe pse është e rëndësishme që qytetarët të jenë të përfshirë në zhvillimin e komunitetit të tyre.
Më pas, nxënësit vizituan kabinetin e kryetarit të Komunës, ku patën mundësi të njihen me punën e kryetarit dhe me përgjegjësitë që mbart drejtimi i një komune.
Nxënësit shfaqën interes të veçantë edhe për punën e sektorit të urbanizmit, ku iu shpjegua se si planifikohet pamja dhe zhvillimi i qytetit. Ata dëgjuan se si miratohen planet urbanistike, si përcaktohen rrugët, parcelat ndërtimore, hapësirat publike dhe të gjelbra, infrastruktura, zonat për këmbësorë, zgjidhjet e trafikut dhe hapësirat për objekte me interes publik.
Vizita vazhdoi edhe në arkiv, ku nxënësit mësuan se si çdo dokument që arrin në Komunë pranohet, regjistrohet, përpunohet, përcillet deri te shërbimet përkatëse dhe ruhet si pjesë e dokumentacionit zyrtar.
Kjo vizitë ishte një mundësi e bukur që nxënësit të shohin në mënyrë praktike se si funksionon një institucion, si merren vendimet dhe se si çdo shërbim ka rolin e vet të rëndësishëm në punën e Komunës.
Pikërisht takime të tilla kanë rëndësi të veçantë, sepse te të rinjtë zgjojnë interes, kureshtje dhe dëshirë për të mësuar. Ndoshta pikërisht në mesin e këtyre nxënësve ndodhet një arkitekt, jurist, urbanist, inxhinier, ekonomist, nëpunës administrativ, këshilltar apo kryetar komune i ardhshëm — dikush që një ditë do të kontribuojë për zhvillimin e Komunës së Kërçovës dhe do të punojë në shërbim të bashkëqytetarëve të tij.
