Kryetari i Komunës në vizitë tek personat e strehuar përkohësisht, inspektim i zonave të përmbytura dhe takime me qytetarët e dëmtuar
Sot, Kryetari i Komunës vizitoi sallën sportive në lagjen Ivanidol, ku janë strehuar përkohësisht persona të prekur nga përmbytjet. Gjatë vizitës, Kryetari i Komunës zhvilloi biseda me qytetarët e pranishëm, u njoh me nevojat e tyre më urgjente dhe ndoqi nga afër organizimin e kushteve të qëndrimit, me qëllim sigurimin e mbështetjes së shpejtë dhe të përshtatshme.
Pas vizitës në sallën sportive, Kryetari i Komunës realizoi inspektim edhe në lokacione të tjera të prekura nga përmbytjet, ku personalisht u njoh me gjendjen dhe zhvilloi takime me qytetarët e dëmtuar. Me këtë rast u shqyrtuan prioritetet për ndërhyrje, nevojat për mekanizim dhe pajisje shtesë, si dhe masat që po ndërmerren për sanimin dhe normalizimin e situatës.
Gjatë aktiviteteve të sotme, Kryetari i Komunës dha intervista për disa media, duke informuar publikun për gjendjen aktuale, masat e ndërmarra dhe hapat e mëtejmë të Komunës së Kërçovës dhe të shërbimeve kompetente për përballimin e pasojave nga përmbytjet.
Komuna e Kërçovës mbetet plotësisht e mobilizuar dhe në koordinim të vazhdueshëm me institucionet kompetente dhe shërbimet në terren, me fokus në:
- sigurimin e strehimit të përshtatshëm dhe kushteve bazë për personat e strehuar përkohësisht,
- vlerësimin e shpejtë dhe evidentimin e dëmeve,
- pastrimin dhe sanimin e pikave kritike,
- mbështetje logjistike dhe operacionale në kohë për zonat më të goditura.
U bëjmë thirrje qytetarëve për qetësi dhe kujdes, si dhe për bashkëpunim me shërbimet kompetente. Për çdo nevojë urgjente, njoftimi të bëhet përmes institucioneve përgjegjëse.
Komuna e Kërçovës do të vazhdojë të informojë rregullisht publikun për aktivitetet dhe masat e ndërmarra për tejkalimin e situatës.
