Takimi i fundvitit me qytetarët e Kërçovës
Komuna e Kërçovës mbajti takimin e fundvitit me qytetarët, ku kryetari Fatmir Dehari, shpalosi të arriturat e viteve të kaluara dhe projektet parësore të planifikuara me Buxhetin e vitit 2020, të cilat u vlerësuan lart edhe nga lideri i BDI-së, Ali Ahmeti i cili ishte i pranishëm në këtë takim.
Pasi prezentoi projektet e realizuara gjatë viteve të kaluara, Kryetari i Komunës së Kërçovës Fatmir Dehari, bëri të ditur prioritetet e Buxhetit të vitit 2020, mjete këto që do të shpenzohen për investime në projekte të rëndësishme që bazohen në kërkesat e banorëve të të gjitha Bashkësive vendore të kësaj komune.
Punët e realizuara tashmë duken, uroj që kryetari Dehari dhe ekipi i tij, të vazhdojnë përpjekjet për zgjidhjen përfundimtare të problemeve tjera prioritare për popullatën vendore, e në veçanti ato të kapitullit të BE-së për ambientin jetësor që duhet realizuar përmes planifikimit të përgjithshëm dhe standardeve përkatëse të zgjidhjes përfundimtare, tha lideri i BDI-së Ali Ahmeti.
Kreu i BDI-së shpalosi edhe të arriturat e BDI gjatë 18 vjetëve të kaluara, të cilat sipas tij, janë produkt i përpjekjeve të vazhdueshme për t’i përfaqësuar shqiptarët denjësisht, edhe në rrafshin kombëtar edhe në atë ndërkombëtar.
Në fund, lideri i BDI-së, Ali Ahmeti dhe Kryetari i Kërçovës Fatmir Dehari, u përgjigjën edhe në pyetjet e qytetarëve të shumtë që morën pjesë në takimin e zakonshëm të fundvitit të organizuar nga Komuna e Kërçovës.
